|
(Тангрингиз ягона тангридир) оятини нозил қилганда мушриклар, қандай қилиб шунча илоҳлар битта илоҳ бўлиб қоларкан, деб инкор этишганди. Бас, Аллоҳ уларни фикр қилишга, ақлларини ишлатишга ва шу орқали бутун коинотни яратган, унинг қисмларини бир-бирлари билан ўта пухта тартиб билан боғлаган Ягона, Бир Яратувчига имон келтиришга чақириб, мана шу оятни нозил қилди. Мана шу ўта пухта тартибнинг ўзи Яратувчининг бирлигига, ягоналигига далолат қилади.
1- Мана бу осмонлару ер, улардаги юлдузлар, ҳамма-ҳаммаси ўта нозик, ажойиб бир низом билан фалакда сузиб юришади. Улардан биронтаси ўз йўналишидан, йўлидан чиқиб кетмайди, бири иккинчиси билан тўқнашиб кетмайди.
2- Мана бу кечаю кундуз, уларнинг ўрин алмашиб туришлари, бирининг ёруғлигию, иккинчисининг қоронғулиги, бирининг дам олишга, ҳордиқ чиқаришга хизмат қилишию иккинчисининг тирикчилик қилишга ишлаши! Нақадар ажойиб! Нақадар ғаройиб!
3- Анави денгизда сузиб юрадиган, одамларга зарур бўлган савдо ёки сафар ашёларини олиб юрадиган кемалар! Уларни сув кўтариб боради, шамоллар ҳаракатга келтиради, мавжлар қамраб олади, уларга урилади. Шундай бўлса-да, улар мавжлар гирдобию денгиз тўлқинлари ичра сузиб бораверадилар.
4- Мана бу осмондан ерга тушадиган сув! У Аллоҳ истаган жойга етиб бориб, ўлик ерни тирилтиради, унинг сарғайган эгнини яшил либосга буркайди.
5- Анави жониворлар! Улар ер юзида тинимсиз кўпайиб, ердан униб чиққан нарсалардан озуқаланиб, туғилиб, яшаб бораверадилар.
6-Мана бу Аллоҳнинг буйруғи ила юргизиб қўйилган шамоллар! Аллоҳнинг қудрати ила осмон билан ер ўртасида бўйсундириб қўйилган булутлар! Уларни Аллоҳ Ўзи истаган тарафига йўналтиради, улар Аллоҳ кўрсатган жойга ёмғир қуядилар.
Мана шуларнинг ҳаммаси ўта нозик, ажойиб бир тартибда бўлиб, ўз низомидан қилча ҳам чиқиб кета олмайдилар. На осмон ерга қулайди. На кеча кундуздан ўтиб кетади. На денгиз ва ундаги кемалар ўз хусусиятини ўзгартира олади. На ёмғир, шамоллар ёки булут Аллоҳнинг фармонига қарши чиқа олади. На ердаги жониворлар ўз табиатларига қарши бора оладилар.
Бу йўналишларда ҳеч қандай изтироб, иккиланиш, бошбошдоқлик йўқ. Сувсиз яшиллик бўлиши, денгизларнинг ўз ўрнини ўзгартириши, шамолларнинг ўз вақтида эсмаслиги мутлақо бўлмайдиган, юз бермайдиган ишдир.
67-бет
Бетлар: 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208